Қазақстан Республикасының Тәуелсіздік күні – ел тарихындағы ұлы мереке!

Қазақстан Республикасының Тәуелсіздік күні – халқымыз үшін аса қастерлі, мағынасы терең мемлекеттік мереке. Бұл күн жыл сайын 16 желтоқсанда аталып өтеді. Дәл осы күні, 1991 жылы, Қазақстан өз тәуелсіздігін жариялап, әлем картасында дербес, егемен мемлекет ретінде танылды.

Тәуелсіздік – ата-бабамыздың ғасырлар бойы аңсаған арманы. Қазақ халқы тарихтың талай сындарлы кезеңінен өтіп, азаттық жолында күрес жүргізді. Кенесары хан бастаған ұлт-азаттық қозғалыстар, Алаш қайраткерлерінің еңбегі, 1986 жылғы Желтоқсан оқиғасы – барлығы да тәуелсіздікке апарар жолдағы маңызды белестер болды. Желтоқсан жастарының ерлігі мен қайсарлығы егемендікке деген халықтың рухын айқын көрсетті.

Тәуелсіздік алғаннан кейін Қазақстан өз даму жолын таңдады. Мемлекеттік рәміздер қабылданып, ұлттық валюта – теңге енгізілді. Еліміз әлемнің көптеген мемлекеттерімен достық қарым-қатынас орнатты. Білім, ғылым, спорт және мәдениет салалары дамып келеді.

Бүгінде Қазақстан – көпұлтты, бейбітшілік пен келісімді ту еткен мемлекет. Тәуелсіздік бізге өз тағдырымызды өзіміз шешуге, ұлттық құндылықтарымызды жаңғыртуға, ана тіліміз бен мәдениетімізді дамытуға мүмкіндік берді. Бұл – әрбір қазақстандықтың мақтанышы әрі жауапкершілігі.

Тәуелсіздік күні – өткенге тағзым жасап, болашаққа сеніммен қарауға шақыратын мереке. Егемен еліміздің іргесі берік, тұғыры биік болып, көк байрағымыз әрдайым биікте желбірей берсін!

Қазақ тілі мен әдебиеті мұғалімі: Канафина Ж.С.